తేనెటీగలు ముసిరిన పున్నమి
యాప కొమ్మల్లో
కండ్ల లోపలి గవ్వల్లో
మబ్బు చిమ్మిన గాలి
పుంజు రెక్కల గాలి
గన్నేరు కాయలు దొర్లినా
ఉలిక్కిపడుతున్నది చీకటి
వచ్చి వెల్లిండ్రేమో వాళ్లు
గాలిమైకం మరొక్కసారి
మసక కప్పుకుని
దారి తప్పింది పిట్ట పిల్ల
గుండ్రంగా తిరిగి తిరిగీ
కనబడని పాట చుట్టూ
వొరిగి జరిగీ
ఆకాశపు రాత్రి తెల్లగా
వొలుచుకున్నాదింక నలుపుని
అనుమాన్ల గుడి చుట్టూ
చప్పుడు చేయని చేతులు
కనుపాపల్ని నిమిరే చేతులు
పసుపు పచ్చని రాయి
గురకపెడుతుంది గుండెలో వొక మూల
దయ్యమో దేవతో
కలలోపలి కునుకో...
గచ్చకాయల కాంతి
వానరాశుల కాంతి
ఏడుపు కాగిన వాసన
మత్తులోంచి తన్నుకొచ్చే వాసన
రారా... అయ్యా ...
వెలిగించు కొన్ని దీపాలు
దిద్దించు దుఃఖాన్ని
గన్నేరుపూల గాలి
నిగనిగలుగా
జరంత వెలుగులో
No comments:
Post a Comment